Jaari hai do jahaan pe huqoomat Rasool ki - ‘Saghar’ Siddiqui Saheb

Jaari hai do jahaan pe huqoomat Rasool* ki,

Karte hain mehr-o-maah ita’at Rasool* ki;

Imaan ek naam hai hubb-e-Rasool* ka,

Hai khuld ki bahaar muhabbat Rasool* ki;

Nok-e-mizha pe jin ke rahe ashk-e-Karbala

Paayenge hashr mein wo shafa’at Rasool* ki;

Gaar-e-hiraa ko yaad hai sajde Rasool* ke,

Dekhi hai pat’tharon ne ibaadat Rasool* ki;

Damaan-e-aql-o-hosh sahaara na de mujhe

Chaahat khuda ki ban gai chaahat Rasool* ki;

‘Saghar’ tamaam-e-aalam-e-hasti hai be-hijaab

Aankhon mein bas rahi hai wo khalwat Rasool* ki;

~ Faqeer ‘Saghar’ Siddiqui Saheb

*Sallallaho Alaihi Wa Aalehi Wasallam

( Nok-e-mizha = Palkon ki nok pe )